LED lampaları necə qorumalı
LED lampaların məhsuldarlığının qoruması
və tez sıradan çıxmaması üçün aşağıdakı bir sıra tədbirləri görmək məsləhətdir:
Gərginlik artımından qoruyun - LED lampalar gərginlik
artımına qarşı çox həssas olur. Əslində LED lampaların çox tez sıradan
çıxmasının əsas səbəblərindən biri gərginliyin qəfil sıçrayışıdır. Keyfiyyətli
LED lampalarda gərginlik artımına qarşı qoruyan mexanizm olur, lakin bəzən bu
mexanizm kifayət etməyə bilər. Elektrik şəbəkəsini gərginlik artımından qoruyan
cihazlar bu problemin ən yaxşı həllidir.
Yuxarı temperaturdan qoruyun -LED lampaların ən böyük düşməni istilikdir. Əslində tavan hissələr
otaqların ən isti sahələridir. Ancaq bəzi
otaqlarda, koridorlarda heç bir hava axını olmadığı üçün tavan hissə xüsusilə
çox tez qızır. Həmin yerlərdə LED lampaların ömrü xeyli azalır. Bu səbəbdəndir
ki, bəzi evlərdə digər otaqlarda LED lampalar uzunömürlü olsa da, hansısa bir
otağın lampaları markadan asılı olmayaraq çox tez sıradan çıxır. Əslində, adətən
bu hallarda problem elektrik şəbəkəsindən yaxud işıqlandırma mənbəyində deyil,
həmin sahədə hava axını olmadığı üçün temperaturun çox yüksəlməsindən irəli gəlir.
Həşəratlardan qoruyun -LED lampalar çox az
istilik yaydığı üçün az həşərat cəlb edir, lakin bəzi həşəratlar yenə də
yaxınlaşır.
Cihazın voltajına diqqət edin -Mütləq istifadə olunan cihazın yaratdığı voltaja diqqət edilməlidir.
Belə ki, əgər siz 50 vatt yaradan cihaza 12 vatt LED lampa taxsanız, lampanın
drayveri lazım olandan çox yüklənəcək və lampa olduqca tez sıradan çıxacaqdır.
Fiziki zərbələrdən qoruyun -LED lampalar adətən plastik üzlüklü olsa da, xüsusilə də həyətyanı
sahədə (quşlar və s. tərəfindən) fiziki zərbələr onların çox asanlıqla sıradan
çıxmasına səbəb olacaqdır. Bu baxımdan, həyətyanı sahədə daha qalın qoruyucusu
olan işıqlandırma sistemləri istifadə etmək məqsədəuyğundur.
Daxili yaxud çöl işıqlandırmanı
düzgün seçin -daxili işıqlandırma üçün nəzərdə
tutulmuş LED lampaları heç bir mühafizə edilməyən həyətyanı sahələrin
işıqlandırılmasında istifadə etmək səhv addımdır. LED lampaların suya və toza davamlılığı IP göstəriciləri ilə ölçülür. Suya
və toza davamlı olan lampaların
qablaşdırmasında “IP65” yazısı olmalıdır. Eynilə də, çöl üçün nəzərdə tutulmuş
lampaları daxili işıqlandırmada istifadə etmək qeyri-effektivdir.